На 4 октомври 2024 година, Еко Логик и Општина Кочани организираа работилница за ко-креирање во рамките на Еразмус+ проектот „ПРИПЕР – Промовирање заштитата на животната средина и учење за климатските промени“. 

Настанот насловен: „Секторот туризам – одржливост, зелени работни места и младите“ имаше за цел да собере млади од Истокот, еколози, туристички професионалци и претставниците на општини на заедничка сесија за учење и споделување искуства и размислувања на неколку теми: одржливост на локалната туристичка индустрија; интересот на младите за работни места поврзани со туризмот; разбирање на зелените вештини и зелените работни места; потребата од зазеленување на туристичката индустрија и соработката помеѓу секторот туризам, граѓанските организации, општините и младите. 

Настанот се одржа во административната зграда на Општина Кочани и на него присуствуваа учесници од неколку општини во државата – Кочани, Радовиш, Делчево, Берово, Пехчево.